ПАНДЕМИЯ КЕЗІНДЕГІ ТАҒЫЛЫМДАМА
Пандемия кезінде академик Ш.Есенов атын. ғылыми білім беру қоры бағдарламаларының жеңімпаздары күнделікті жұмыстарымен қатар шетелдік тағылымдамадан өту үшін стартап іздеуді жалғастыруда. АҚШ-тың IT-стартаптарындағы тағылымдама бағдарламасының осыған дейінгі 15 жеңімпазы жарты жылын Кремний алқабында өткізе алса, ал өткен жылдың жеңімпаздарының жолында айтарлықтай кедергі – ковид тұрды. Олардың істері қалай жүріп жатқанын Қордың қамқоршысы, ғылым докторы және стартапер Эльдар Ахметгалиевпен жақында өткен кездесуде білдік.
АҚШ-та тұрақты тұрғыны Эльдар Алматыға ұшып келіп, Дархан Аймағанов, Шыңғыс Кеңесов, Айнұр Махмет және Жанар Тәңірбергеновамен кездесті. Қордың құрылтайшысы Ғалымжан Есеновтың өткен жылы жеңіп алған барлық гранттарды 2021 жылдың соңына дейін сақтап қалу туралы шешіміне қарамастан, кездесуге қатысқан бағдарламаның бесінші жеңімпазы Айдос Сәрсембаев қор есебінен тағылымдамадан өтуден бас тартты. Өткен жылы ол қызықты жұмысқа орналасып, жұмыс беруші алдындағы міндеттемелері оның АҚШ-қа алты айға кетуіне жол бермеді.
Қатысушылар тағылымдамадан өту орнын іздестіру жұмыстары қалай жүріп жатқаны туралы айтты – олардың барлығыда қазіргі уақытта жұмыс істейді. Дархан – One Technologies компаниясының жетекші деректер талдаушысы. Дегенмен, «Кар-Тел» компаниясында еңбек етіп, ҚазҰУ-да Машиналық оқыту және деректерді талдау мамандығы бойынша магистратурада білім алып жатқан Айнұр Махмет сияқты ол да өзін АҚШ-та қабылдайтын стартапты іздеуді жалғастыруда. Шыңғыс стартаптан шақыру алды және Американың бұрынғы президенті Д.Трамп енгізген АҚШ-қа кіруге тыйым салудың аяқталуын күтіп, жұмыс істеу үшін қажетті J1 визасын алуға құжаттар тапсырады. Шыңғыс шақырушы стартаптың тұрақты кеңсесі жоқ екеніне қарамастан, оған виза беріледі деп үміттенеді, өйткені бұл американдық иммиграциялық қызметтердің шешіміне теріс әсер етуі мүмкін. Жанар Artmedia компаниясында backend әзірлеуші болып жұмыс істейді. Ол өткен жылы тағылымдамадан өту үшін Стартап тапқан болатын, алайда пандемия мен АҚШ билігінің шешімдері виза алуға кедергі болды.
IT стартаптардағы тағылымдама бағдарламасының жеңімпаздарымен кездесу соңында Қордың қамқоршысы Э.Ахметғалиев сұрақтарға жауап берді. Стартаптардың негізін қалаушылармен қарым-қатынас жасау кезінде қазақстандықтарға өздерінің барлық құзыреттілігін, жұмысқа қабілеттілігі мен сенімділігін көрсетуді үйренуді ұсынды. Алқаптың біртіндеп стартаптардың орталығы болудан қалып бара жатқанын атап өтті. Бұл тұрғын үй құнының негізсіз өсуіне байланысты: Сан-Францискода жылжымайтын мүлік бағасы аздап төмендегенімен, бірақ оны жалға алу құны едәуір өсті. Көбісі ол жерден кетіп, өз бизнестерін Калифорния (Сан-Диего, Лос-Анжелес) және басқа штаттарда (Техас, Нью-Йорк, Огайо, Колорадо) құруда. Сондықтан да, стартаптарды іздеу географиясын кеңейтуді ұсынды. Сондай-ақ, Ахметғалиев деректер туралы ғылым саласындағы мамандарға сұраныстың өсіп келе жатқанын атап өтті. Көптеген салалар машиналық оқытуды өз жұмысына енгізуге тырысуда.
Ахметғалиев АҚШ-тың қалыпты өмірге оралу тақырыбын да қозғап өтті:
— Кейбір штаттарда Вакцинация өте жылдам қарқынмен жүруде, сондықтан тұрғындардың көпшілігі жазға дейін вакцинацияланады деген үміт бар. Қазіргі таңда вакцинаны шамамен 80 миллион американдық алды. Сондықтан, жазда тағылымдамадан өтуге кеңес беремін, өйткені күзге қарай Штаттар пандемияға дейінгідей өмірге оралатын болады. Сонымен қатар, АҚШ-тың кез келген мемлекеттік органына ақпарат берген кезде ештеңе жасырмай, әрқашан шындықты айту керек.
Кездесуде ол бөліскен ақпараттан қазіргі уақытта компаниялардың көпшілігі әлі де пандемия салдарынан зардап шегіп жатқаны белгілі болды. Yessenov Foundation қамқоршысының айтуынша, олардың аз бөлігінің ғана жұмысы жақсы жүріп, қарқын алуда.
29.03.21, Жаңалықтар
Көру саны: 142