YESSENOV FOUNDATION – IESO 2025 ҚАЗАҚСТАН КОМАНДАСЫНЫҢ ДЕМЕУШІСІ

Айгерім, IESO олимпиадасы биыл қай жерде өтетін болады?
Биылғы олимпиада тамыз айында Қытайдың ғылым және технологиялар қаласы Цзининде, Конфуций мектебінің (Jining Confucius School) базасында өтеді. IESO дәстүрлі түрде геология, геофизика, метеорология, мұхиттану және астрономия сияқты пәндерді қамтиды.

Жанат Қабиевна, Сіздің қорыңыз ұлттық құрамаға іріктеуді қашан өткізеді?
Ұлттық іріктеуге қатысуға өтінімдерді 15 ақпанға дейін қабылдаймыз, ал іріктеу 22 ақпанда басталады. Іріктеу ережелері мен өтінім анкетасын біздің сайттан табуға болады.

Еліміздің мектептері олимпиадаға іріктеу туралы қалай біледі?
Іріктеу туралы барлық ақпаратты біз НЗМ, БИЛ (бұрынғы ҚТЛ) жүйесіндегі мектептер, «Жас геолог» үйірмелері және Қазақстанның жалпы білім беретін мектептері арасында тараттық.

Іріктеу қалай өтеді?
Бірінші кезең – онлайн тест. Ол 22 ақпанда Nazarbayev University платформасында онлайн өтеді. Тест ағылшын тілінде болады. Қатысушылар ағылшын тілін және терминологиясын жоғары деңгейде білуі тиіс, өйткені IESO-да шетелдік құрдастарымен тең дәрежеде бәсекелесу үшін бұл өте маңызды. Екінші кезең Наурыз мерекесі қарсаңында сол университеттің Тау-кен ісі мектебінде өтеді. Іріктеуді «Жас геолог» және Yessenov Foundation қорларының қызметкерлерінің қатысуымен, Қазақстан Республикасының Индустрия және құрылыс министрлігіне қарасты Геология комитеті және Nazarbayev University өкілдері кіретін конкурстық комиссия жүргізетін болады. Екінші кезеңнің жазбаша тесті мен ауызша турының сұрақтарын Nazarbayev University профессорлары дайындайды. Тест тапсырмалары Жер туралы ғылымдар бойынша халықаралық олимпиадада дәстүрлі барлық пәндерді қамтиды. Тапсырмалар алдыңғы IESO олимпиадаларында қолданылған нұсқаларға ұқсас болады. Төрт жеңімпаздың есімі 22 наурызда жарияланады.

Айгерім, тағы бір сұрақ: Yessenov Foundation-ның Қазақстан мектеп оқушыларының IESO 2025 олимпиадасындағы командасына демеушілік көрсетуі неден тұрады?
Біз іріктеу процесіне қатысамыз және еліміздің бүкіл құрамасының – ұлттық іріктеуден сәтті өткен төрт жоғары сынып оқушысы мен оларды ертіп жүретін ересек адамның жол жүру, тұру және тамақтану шығындарын толықтай қамтамасыз етеміз. Олимпиада ережелеріне сәйкес, оның қатысушылары негізінен балалар, кәмелетке толмағандар болғандықтан, команданы ересек адам ертіп жүруі тиіс. Біздің жағдайда бұл – «Жас геолог» қорының өкілдері. Сонымен қатар, Yessenov Foundation Қазақстанның IESO-ға қатысуына байланысты ұйымдастыру жарнасын төлеуді қамтамасыз етеді. Еліміздің оқушылар командасына аталмыш халықаралық жарыста демеушілік көрсетіп отырғанымызға биыл бесінші жыл болды.